Linde Steyn
Organiseerder
hokkie@oos-moot.co.za
Die skool het dogters- en seuns hokkiespanne wat aan die PUK-reeks, hokkieliga en toernooie deelneem. Ons het in 2021 ons hokkiefasiliteite opgegradeer met ‘n ASTRO baan. Dit is ook die enigste fasiliteit van sy soort in die Moot area. Dario Lourenco (Suid-Afrikaanse binnenshuise hokkiespeler) is aangestel as die bestuurder van die Astro en afrigter van die eerste hokkiespan. Daar word vroeg in die seisoen begin met vaardigheidsoefeninge en proewe sodat spanne kan fokus op spanwerk en vaardigheid.
Oosie-Junior Hokkie akademie (volg die blou knopie)
Ons spog met die eerste en enigste Astrobaan in die Moot en moedig ons laerskoolleerders wat in hokkie belangstel om nou reeds in te skakel by die skool se Oosie-Junior Hokkie-akademie waar hul die nodige vaardighede en tegnieke geleer word.
2023
Dit was ‘n goeie jaar vir Oos-Moot se hokkie.
Die seuns het aan die Northerns C-liga deelgeneem en vir die eerste keer kon ons drie spanne inskryf. Die eerste seunshokkiespan het vir die tweede agtereenvolgende jaar as ligawenners uit die stryd getree. Hulle het negende geëindig in die NWU-reeks en die o.16-seuns agtste. Die o.16-seuns eindig vierde in die liga. ‘n Wonderlike prestasie aangesien hierdie seuns eintlik o.15 is.
Die dogtershokkiespanne het goeie vordering in die NWU-reeks getoon en al die spanne het in verbeterde posisies geëindig. Ons het in die Northerns A-liga teen top skole in die land meegeding waar ons spanne deursettingsvermoë en goeie sportmanskap ten toon gestel het. Ons neem in 2024 weer deel aan die A-liga en sien uit na mooi prestasies.
Die Oosies het ook die geleentheid gekry om teen internasionale uitnodigingspanne deel te neem. Die o.16 Noordvaalspan het teen Wolverhampton Grammar School van Engeland gespeel en met ‘n telling van 2 – 1 gewen. Die eerste span het gelykop in hul wedstryd geëindig. Beide die seuns- en dogterspanne het teen spanne uit Swaziland meegeding en oortuigend gewen.
